• Femidanın gözlərini pul tutarsa...

    Femidanın gözlərini pul tutarsa...

    Bakı Ağır Cinayətlər Məhkəməsinin hakimi Cavid Hüseynovdan Prezident İlham Əliyevə - ŞİKAYƏT

    Rubrika.Az saytında 8 oktyabr 2018-ci il tarixində Maşallah Bayramov və Cəmil Ələkbərovun müraciəti əsasında “Həkimlə hakimin iş birliyi” başlıqlı yazı dərc olunmuşdu. Bir daha xatırladaq ki, şikayət məktubunda C. Ələkbərov bir qrup şəxs tərəfindən dələduzluq yolu ilə aldadıldığını, bunun faktlarla tam sübuta yetirilməsinə baxmayaraq, məhkəmənin işi birtərəfli apardığını, onu aldadan şəxsləri müdafiə etdiyini bildirir.
    C. Ələkbərov bildirir ki, “Bakı Medikal Plaza” Klinikası baş həkiminin sabiq müavini Qasımov Feyzulla və onun oğlu-qanunsuz hüquq xidmətləri göstərən, özünü hüquqşünas kimi təqdim edən, əvvəllər də dələduzluğa görə həbs olunan, hal-hazırda Bakı Şəhər Baş Polis İdarəsində barəsində dələduzluq maddəsi ilə istintaq gedən Rafael Qasımov əvvəlcədən əlbir olaraq onu və atasını vakansiya elan olunan yüksək vəzifələrə işə düzəltmək adı ilə aldadaraq 50 min dollar pulu öz kabinetlərində ondan alıblar. Feyzulla Qasımov zərərçəkənlərin etimadını qazanmaq üçün “əlim hər yerə çatır, Səhiyyə naziri ilə bağda tez-tez görüşürəm, oğlum Rafael hüquqşünas işləyir, sənədləşmə işlərində bizə kömək edəcək. Onun özünü də bu yaxınlarda icra başçısı qoyacaqlar, əmrin gözləyirik” deyərək onları aldadaraq əvvəlcədən planlaşdırılmış ssenari üzrə pullarını almışdır. Daha sonra zərərçəkənlər filmlərdə olduğu kimi növbəti aldatma səhnəsi ilə üz-üzə qalıblar. Özünü Səhiyyə Nazirliyinin yüksək vəzifəli şəxsi Gülmirzə Poladov kimi təqdim edən şəxs Hüseyn Ələkbərova (C.Ələkbərovun atası) dəfələrlə zəng vuraraq Feyzullanın xahişi əsasında bu işlə məşğul olduğunu, nazirin də məsələdən xəbərdar olduğunu və bu yaxınlarda onları qəbul edəcəyini bildirib. F. Qasımov dəfələrlə onları nazirin qəbulu adı ilə Səhiyyə Nazirliyinə göndərib, lakin zərərçəkənlər saatlarla orda gözləməli olsalar da , sonra “nazirin qonağı var ,qəbul qaldı başqa vaxta” bəhanəsi ilə əliboş geri dönməli olublar. Lakin Gülmirzə Poladovun zəngləri və qurulan tamaşa nəticəsiz qalmayıb- zərərçəkənlər inanaraq 50 min dolları F. Qasımova veriblər. Pulu aldıqdan sonra G. Poladovdan zənglərin kəsildiyini görən zərərçəkənlər şübhələniblər və məsələni araşdırmaq üçün Səhiyyə Nazirliyinə gediblər. Bu zaman aydın olub ki, əslində onlara zəng edən heç G. Mirzəyev deyilmiş. “G.Poladovun otağına yaxınlaşıb hər dəfə bizə zəng olunan nömrəyə zəng vuranda telefonda cavab verənin əsl G.Poladov olmadığını başa düşdük. Çünki əsl G.Poladov otağında öz müavini ilə söhbət edirdi. Biz aldadıldığımızı anladıq. Məlum oldu ki, bizə G.Poladov adı ilə zəng vuran Feyzullanın hüquqşünas oğlu Rafael Qasımovdur. İfşa olduqlarını görən dələduz ata-bala yalvarmağa, pulu qaytarmaq üçün vaxt istəməyə başladılar.”
    Zərərçəkənlərin şikayəti əsasında Xətai RPİ-də cinayət işi başlansa da cinayətkarlara qarşı heç bir tədbir görülməmiş, onlar azadlıqda qalmağa davam ediblər. Heç bir tədbir görülmədiyi üçün bu dəfə C. Ələkbərov Bakı şəhər prokuroru İlqar Abbasova müraciət edib, 2 dəfə özünün, müavinlərinin qəbulunda olub. Nəticədə iş Xətai RPİ-dən alınaraq Bakı şəhəri Baş Polis İdarəsinə verilib. Müstəntiq Rauf Məmmədov işə yenidən baxaraq cinayəti tam sübuta yetirib və Feyzulla Qasımov həbs olunub. İşin ssenari üzrə getmədiyini görən dəstənin başqa bir üzvü prosesə qoşulub. “Feyzullanın kürəkəni, BDU-nun hüquq fakültəsinin sabiq dekan müavini, professor Məhəmməd İmanlı prosesə qoşuldu. Məhəmməd İmanlı Bakı Şəhəri Baş Polis İdarəsinə gələrək müstəntiqin yanında cinayəti etiraf etdiyini və dəymiş 50 000 dollar ziyandan 20000 AZN ödəmək istədiyini, qalan pulu isə 1 aya ödəyəcəklərinə dair yazılı iltizam verdi. Nəticədə mən Feyzulla Qasımovun ev dustaqlığına buraxılmasına etiraz etmədim və o ev dustaqlığına çıxdı.”-deyə C. Ələkbərov bildirir.
    F. Qasımov ev dustaqlığına çıxdıqdan sonra pulu ödəməkdən qəti şəkildə imtina edir. Məhəmməd İmanlı isə bildirib ki, “Feyzullanı türmədən çıxarmaq üçün belə etdik, sənə veriləsi pul yoxdur. Get bildiyini elə.” Şikayətçilər bildirir ki, ibtidai istintaq zamanı işin məhkəməyə getməməsi, həmçinin Feyzulla Qasımovun guya adına xələl gəlməməsi üçün onlara F. Qasımovun kürəkəni Məhəmməd İmanlı və oğlu Qasımov Rafael tərəfindən 30000 AZN pul ve mülki qaydada borc müqaviləsi təklif olunub. Onların növbəti ssenarisinə görə bu yolla cinayət işi polis idarəsində xitam olunmalı idi. Lakin bu dəfə zərərçəkənlər növbəti tələyə düşmür və qurama borc müqaviləsini imzalamaqdan imtina edərək pulun tamamını- 57552 AZN-i tələb edir.
    C. Ələkbərov bildirir ki, bu dəfə ona təzyiqlər etməyə başlayıblar: “Razı olmayacağım təqdirdə bu 30000 AZN - i hansı hakimin qarşısına qoysalar Feyzullanı təmizə çıxaracağını, onların sözü ilə desək " açıb buraxacağını" dedilər.
    Şikayətçilər Cəmil Ələkbərov və Maşallah Bayramov bildirir ki, Ağır Cinayətlər Məhkəməsində hakim Cavid Hüseynovun sədrliyi ilə artıq bir ilə yaxındır ki, işə baxılsa da proses artıq demək olar ki, heç kəsə məlum olmayan səbəblərdən qəsdən uzadılır, süründürməçilik baş alıb gedir. Məhkəmə artıq yekunlaşsa da 2 aydır ki, çıxışlar mərhələsi uzadılır. Artıq dövlət ittihamçısı çıxış edərək dələduzluq faktının dəlillərlə sübuta yetirildiyini bildirərək 6 il həbs cəzası tələb edib. Lakin, məhkəmə prosesi “ötür-ötür” oyununa çevrilib, hər dəfə bir bəhanə ilə məhkəmə prosesi təxirə salınır.
    “Süründürməçilik artıq bizi cana gətirib. Artıq bizdə belə qənaət yaranıb ki, Rafael Qasimovun mənə dediyi “Cəmil 30000 manat pulu götürüb bizdən əl çək, Məhəmməd İmanlı professordu, məhkəmə işçiləri hamısı onun tələbələri, dostlarıdır. Bu pulları hansı hakimin "qabağına atsa" atamı buraxacaq” sözləri içimizdə çox ciddi şübhələr yaradır. Çünki, dələduzluq faktı təkzibolunmaz dəlillərlə sübuta yetirilsə də məhkəmə açıq aşkar qarşı tərəfi müdafiə edir, işi qəsdən uzadır. İşin bu qədər uzadılmasının bir tərəfi də odur ki, müddət F. Qasımovun həbs müddətindən gedir. Qeyd etdiyimi kimi, hakim Cavid Hüseynovun məhkəmə prosesinə müdaxilə edə bilməsək də açıq şəkildə prosesin uzadılmasını açıq büruzə verir. Məhəmməd İmanlı prosesin belə gedişatından “ilhamlanaraq” deyir ki, məhkəmədə tamamilə bəraət alacam, hətta Cəmilə verdiyim 20 min manatı da geriyə alacam.
    Onlar hər vasitə ilə şahidə təzyiq edirlər ki, öz ifadəsini dəyişsin. Şahidi dilə tutur, qorxudurlar ki, pulu F. Qasımova yox, Cavanşir adlı şəxsə verdiyini desin və bu yolla onu xilas etsinlər. Lakin, şahid faktı təkzib etmir və ifadəsini dəyişmir”-deyə şikayətçilər bildirirlər.
    Redaksiyamıza zərərçəkənlər tərəfindən təqdim edilən səs yazısında Məhəmməd İmanlının şahidi dilə tutması öz əksini tapıb. Səs yazısında M.İmanlı şahidə bildirir ki, F.Qasımovu xilas etmək üçün o, pulu Cavanşirə verdiyini desin. Şahid isə bildirir ki, F. Qasımovla görüşəndə o pulların məhz ona neçə dəfəyə, harada, necə verildiyini bildirəcək. Şahid israr edir ki, “mən əsl həqiqəti F. Qasımova deyəcəyəm ki, pul sənə verilib, harada verilib, necə verilib.” Səs yazısında M. İmanlı vaxtın daraldığını, F. Qasımovun xilasının məhz şahidin ifadəsini dəyişməyində olduğunu həyacanla bildirir.
    Şikayətçilər bildirir ki, onlar bu mütəşəkkil dəstənin heç də ilk qurbanları deyillər. Onların qurbanlarından biri də Vidadi Axundov olub. Onun şikayətindən sonra Rafael Qasımov Nəsimi RPŞ tərəfindən həbs olunub və dəymiş ziyanı ödəndikdən sonra ev dustaqlığına buraxılıb. Bu dəstənin daha bir qurbanı isə Dilqəm Eyvazovdur.
    Qeyd edək ki, onlar digər zərərçəkən Maşallah Bayramovun oğlunu Prezident Aparatına işə düzəltmək adı ilə 34.000 ABŞ dolları pulunu almışlar. Bu faktla bağlı Bakı Şəhər Baş Polis İdarəsində istintaq gedir. Lakin şikayətçilərin bildirdiyinə görə, onlara məlum olmayan səbəbdən bu “istintaq işi” də uzadılır.
    “Biz ölkə başçısına, Birinci Vitse-prezident Mehriban xanıma, bütün hüquq-mühafizə orqanlarına müraciət edirik. Bu təhlükəli dəstəyə “dur” deyilməyənə qədər onların qurbanlarının sayı hər gün çoxalacaq. Hələ çox günahsız insanlar onların toruna düşərək qurban gedəcək. Yenə də qeyd edirəm ki, özləri dedikləri kimi artıq hakimlə də “anlaşmaya getməsi” bir insan olaraq mənim də içimdə şübhələr yaradır. Əks təqdirdə nədən sübuta yetirilmiş cinayət əməli C. Hüseynov tərəfindən aylardır ki, uzadılır. Bəlkə hakmiə bu qədər dələduzluq faktı azlıq edir, o yeni qurbanların olmasını da arzulayır.
    Xahiş edirik ki, məsələni nəzarətə götürəsiniz. Onların azadlıqda qalması neçə-neçə vətəndaşın növbəti “qurban” olması təhlükəsini yaradır!” deyə müraciət müəllifləri kömək istəyirlər.

    Nicat Nahmudov
    Rubrika.Az


    Facebook-da paylaş